CBC nih Mindat ah Chin Peace Forum tuah timh mi hi kan duh lo a si lo: CM Pu Salai Lian Luai

CBC hruainak le tawlrelnak in Mindat ah tuah an timhmi a voi 2nak Chin Peace Forum cu NRPC nih CNF an i tel ca ah tuahnak nawl a pe hna lo tiah Chin Cozah nih February 3 thawngfianhnak a tuah mi ah kan theih.

Hi kong he pehtlai in Chin Ramkulh Chief Minister Pu Salai Lian Luai nih, “CBC hruainak in Mindat ah tuah an timhmi Chin Peace Forum kong ah Media tampi nih Chin Ramkulh cozah mawh an kan phurhter. Hi tuah an timh mi hi CNF lawng si lo in ramkheel party an i tel ca ah Chin Ramkulh Cozah nih nawl kan ngei kho lo. NRPC nih CNF aa tel caah tuah khawhnak nawl a pek lo mi hna a si. CNF i tel lo in biaknak lei lawng tuah hna sehlaw nawl pek cia an si ko cang. Kanmah leikap in NRPC ah tha tein ca zong kan tial piak hna, tuah khawhnak nawl an ngah khawhnak hnga kan tawlrel piak ve ko hna. Asinain NRPC lei i rian ngei upa khual a tlawn ca ah a caante ah an kan let kho lo.

A donghnak ah ca an kan leh mi cu ‘rak tuah hna hlah seh’ ti hi a si. Atu tuah an timh mi hi biaknak lei lawng si sehlaw cu zeihmanh a buainak a um hnga lo,” tiah February 3 ah tuah mi thawngfianhnak ah a chim.

Cun, Sipin Minister Pu Soe Htet nih, “hi kong he pehtlai in kan mah lei kap in ca zong kan tial piak ko hna nain ca an kan leh than hi January 29 zinglei sang ah a si. NRPC nih January 29 zinglei sang lawng ah CNF lei tel lo in an tuah ding a si cun, rak tuah ko hna seh tiah thawng an kan thanh. Thawng an kan thanh le cangka in Pengkomh zung lei i rian ngeitu hna sin ah phone in biaknak lei lawng in tuah khawhnak nawl an ngeih kha kan chimh hna nain an rak i tim ti lo,” tiah a chim.

Hi Chin Cozah nih an khap mi hna kong he pehtlai in CBC General Secretary Rev. Dr. Law Ha Ling nih “Anmah nih ‘ramkheel party kong nan chim in nan tuah lai lo’ an kan ti nain ‘nanmah tu nih ramkheel le party ca ah nan tuah mi a si hih, tiah ka ti hna,” tiah The Hakha Post a chim. Cun “Hi kong ah an i ruah lo mi a hnuzul zong um te sehlaw hngalh lo a si” tiah a chimchap.
Atu Chin Peace Forum tuah an timh mi hi a voi 2nak a si i, a voi 1nak hi Falam khuapi CBC zung ah 2019 January 17-18 tiang an rak tuah bal cang.Credit-The Hakha Post

Be the first to comment

Leave a Reply

Your email address will not be published.


*