Chin Hero Pu Ro Thang, Pu Hrang Nawl le CNF

A Thi Cangmi Chin Miphun Ni (CND) Thlankhor Chungin A Thawhthan Tertu
Chin Hero Pu Ro Thang, Pu Hrang Nawl le CNF
===============================

◾1950 ah Chin Affairs Council (Chin Cozah) nih 1948 Febuary 20 cu Chin Miphun Ni (CND) tiah biakhiah nak an ngei i, cun Kawlram Cozah zong nih a hnatlalk pi ve hna.

◾1951 ah Avoi khatnak (a hmasa cem) CND puai cu Mindat Khua ah an rak tuah. Vuancichok U Nu, Karen Vuanci Mahn Ba Saing, Home Affair Vuanci zung Secretary U Thar Khin le a dangdang pengkulh Bawizik hna zong an rak itel caah CND puai cu rampi theih in a sunglawi tuk hringhren. Cuticun pehzulh thliahmah tein CND puai cu an rak tuah.

◾1956..CND cu an thah i, Pangpar Ni (The Flowers Day) tiah an thlen.

A voikhatnak Chin Affairs Council le, a voihnihnak Members of Parliament (MP) meeting cu 1956 July thla Falam ah an tuah. .MP dihlak 14 ansi i Pasapala in 12 le Independence in Pu Ro Thang le Pu Hrang Nawl ansi. Vuanci Zahre Lian hruainak in Chin National Day (CND) cu Chin Ramuk Dohnak ni asi caah ahman lo. Cucaahcun Chin Miphun Ni sitiloin PANGPAR NI tiah kan auh lai tiah ruahnak thar a chuak. Mah kong cu Pu Thang Lian nih biasuu ah a chuahpi i, Pu Sang Ning nih a dirkamh. Pu Ro Thang le Pu Hrang Nawl nihcun an duh bak lo. Ramuk dohnak ni asilo Mirang Dohnak ni asi tiah hmunkhat teah an t’ang. A donghnak ah vote an thlak i 12/2 asicaah Chin Miphun Ni cu an thah i, Pangpar Ni tiah an thleng. Pu Hrang Nawl cu a thinhang tuk ve caah “vote in kan sung bak asinain ka duhbak lo..Hrawn Nawl a hnatla lo tiah record ka chiah piak uh a rak ti hna caah record ah an chiahpiak ve. Vumtu Maung le Mang Tung Nung zong nih CND thah cu an lung a tling lonain MP lo hrat cu an holh kho ti lo. Cutincun Chin Miphun Ni cu a thi ruangmaang.

◾1957.. Pu Hrang Nawl, Pu Vumtu Maung le Pu Mang Tung Nung cu Rangoon ah an i tong hna. An ruahnak le an zumhnak aa khat caah Tualto Chin Party “Chin National Organization” (CNO) cu an dirh. Chairman ah Vumtu Maung asi i Gen. Secretary ah Pu Hrang Nawl asi.
Tualto Chin Party CNO min in CHIN NATIONAL DAY (CND) cu Tidim ah an rak tuah. Akum vui ah Halkha ah an tuah rih. Chin Miphun Ni thah an siang locaah anmah Tualto Chin Party nih CND cu an pehzulh.

◾1958 Baho Pasapalah cu Tanhsin le Ti-me tiin cheuhnih ah an i t’hen i Chin ramkulh zongah cheuhnih ah an i t’hen ve. MP 12 chungin 6 veve an i t’hen i cozah an ser kho veve lo. Pu Hrang Nawl cu leirawi ruangah MP in a chuak cang i Pu Ro Thang lawng a tang. Tanhsin le Ti-me Pasapala nih Pu Ro Thang cu an lei t’ang dingin an sawm veve. Ti-me hruaitu Pu Thang Lian le Pu Ro Thang cu hnatlaknak an ngei. Pu Ro Thang nih vuanci hmun cu kan kianh lai, asinain Pangpar Ni kha Chin Miphun Ni ah thleng dingin biakamnak na ngei ahcun nan sin ah ka um lai ati. Pu Thang Lian zong a hna a tla ve caah Pu Ro Thang cu Ti-me ah alut i Pu Thang Lian zong Vuanci ah a chuak taktak ve. Vuanci Than Lian nih a biakam bantuk tein Pangpar Ni cu an thahthan i Chin Miphun Ni tiah auh than asi.
1959 Rangoon ah CND cu an rak tuah than i President Saw Shwe Thaik zong nih a telpi ve hna. Cunticun Tualto Chin Party CNO Hrang Nawl te he ifonh tthan in CND cu thihnak in a thot’han.

◾1974-2015 Newin Masala chan thok in Than Shwe Ralkap chan tiang Chin Miphun Ni (CND) thahpiak than asi hoi. Chin Miphu Ni tisiloin CHIN PINE NI tiah an thlen.

◾2016 Tualto Chin Ralkap (CNF) riantuannak thawnin Chin Miphun Ni cu voihnihnak a thothan nolh. Zapi nih kan theihmi asi kocaah tam chim a hau lo. CNF thawngin CND cu zalong tein kan tuah khawh thannak asi ko.

🔺Chin Miphun Ni nunnak a Petu Hero hna:–

1. Pu Ro Thang
2. Pu Hrang Nawl
3. Tualto Chin Party (CNO)
4. Tualto Chin Army (CNF)

Upatnak kan pek hna…………

Ref.. Chawn Kio ,Lian Cin,Zomi Press

Credit-Jacob R. Thang

Be the first to comment

Leave a Reply

Your email address will not be published.


*