Lobak si ko:Mindat khua Chin Miphun lungrual nak civui an tuah kho lo

Buchohci Thein Sein (President-Budish) , Buhmuchoh Hung Ngai ( CM-Budish ) Ralkap uknak tikhawh rih mi USDP cozah chan ah zalong tein Hakha khuapi Carson Hall ah tlunghlai taktak in Chin Nationnal Conference pi cu (2013) November (12-15) tiang nithum chung rak tuah khawh a si.

Mah hi Conference ah CNF le Chin party hruainak in rak tuah mi a si i biaknak lei hruaitu kan pastor te hna, CSO aiawh vialte hna, ramchung ram leng Buu aiawh vialte hna, Nubu kuzale hna, Mono kuzale hna ti bantuk in tlamtling tein rak kai a si. NCA kong, ramkhel kong, thancho nak kong, remdaih nak kong, pawngkam zohkhenh nak kong vialte rak caihkhan nak le biachah nak tampi rak tuah a si. Zei khenkham nak hmanh a rak um lo, cozah lei zong nih rak telpi tu a si.

A tu mipi thimmi NLD cozah , Chin mi chungin Pathian thluachuah kan don mi Vice-president kan neih lio, Vuancichoh Khrihfa kan si lio, Hluttaw chairman Khrihfa kan si lio cozah le minister tampi khrihfa kan si lio cozah ah kan mah Chinram, Khrihfa ram Mindat khua ah CBC hruai nak in tuah timh mi Chin miphun lungrual nak, thancho nak , daihnak remnak le pawngkam zohkhenh nak kong caih ding mi conference picu khual tampi phak hnu ah CNF an i tel ti ruang le ramkhel party pawl an i tel ti ruang ah tuah nak nawl pek lo in kirter cu ralkap uk lio Khin Maung Zi chan le vailamtah tungphur chan kan hluan hoi ko ne lo maw?

Hmaikal mi democracy si loin hnu kir mi democracy kan chuah cang ko lo maw ti ruah lo awk a tha lo, federal cu kan hlat chinchin hoi ko cang ti chim khawh a si cang. Atu kan ton mihi Chin miphun nih hnu pil loin kan lungrual nak ah hmang chinchin hna u sih, hmai ah fong u sih, khuaruat than u sih, kan kut i sih than hna u sih, thazaang lak nak ah hmang u sih tiah sawm kan duh hna.

1947 in nihin ni tiang Chin miphun kan sungh mi thil vialte cu hriamnam, fimnak, thiamnak, rumnak le thil dangdang in kan tei hna in kan hmu than kan la than kho lai lo, lungrual nak lawng in kan lakthan khawh hna lai. Cu caah kan lungrual cu an tih tuk i Mindat khua tuah timh mi Chin miphun lungrual nak conference picu an kham nak a si. Kan lungrual nak an hmuh ni ah federal zong kan co lai.
Credit -Lal Maung Cung Cinzah

Be the first to comment

Leave a Reply

Your email address will not be published.


*