Pelosi vs Trump

Impeachment Trial liopi cu si kaw an sosat ning kha an thup kho deuh veve lo. Speaker nih kut a chanh i President nih a tlai duh lo. Cu liote ah Speaker cu umtu mithmai vun put thiam colh kha aa harh pah, “ngakchia ningzah ṭah, upa ningzah nih” an ti phun kha a hun si.

Nain, nutling a sinak te kha cu a hun langhter khawh ve, a mithmai a rawk tuk hraw lo, a hun i hrim hram i, Speaker dirhmun in a tuah a herh colhmi, President cu Members of Congress hmaiah introduce a hun tuah.

Nain, “Members of the Congress, the President of the United States” ti viar lawng kha a chim i, voidang State of the Union lioah Speaker nih an chim tawnmi “I have the high privilege and distinct honor of presenting to you” timi biatlang cu a chim ti lo.

Speaker Pelosi hi Daw Aung San Suu Kyi he aa daw ngai tonmi an si i, apa hi Democratic Congressman tiang a rak si balmi, Democratic Party ah a pa chan tein a turu ngai cangmi chungkhar, an party in congresswoman hna term 17 tiang a ṭuan cangmi asi caah an buu cu a ṭanh bak ko ti kha a lang ngai tawn.

Anih hi U.S ramah Speaker a ṭuan balmi nu um chun le President pakhatkhat a caan sual i a rian a ṭuan khawh ti lo sual cun Vice President hnuah President rian a vun chang colh dingmi a hun dot colhtu (2nd in presidential line of succession) kha a si. Tulio U.S.A ahcun huham a ngeibik pakhat kha a hun si.

President nih State of the Union (SOTU) a chim lio ahhin U.S.A ram hruaitu deuh cu tling nawn tein chuak ton hna kaw hi bantuk an zapi tein an ipumh lio te ahhin chikkhat vanchiat thil hna a caan thut sualcun President rian a hun cang colh dingmi an um sual lai lo an ti caah Cabinet vuanci pakhat cu “tutan cu nang inn rak hngak” an ita ton hna i, Vuanci pakhat poah cu inn ah a rak um tawn, an ti. Cucu “a designated survivor” an timi kha asi i, U.S.A ram himnak caah a kakip in an iralrin thiam zia nih zohchunh an tlaknak zong kha a hun langhter.

Cutin Speaker Pelosi cu milianpi cu si ve kaw President nih a kut a chanhmi a tlaihpiak duh lo cu ka leh ṭhan ve ti bia maw asi hnga, President biachim a dih hnuah, President nih a kutah a pek tami a biachim catlap cu a thleh dih.

Speaker Pelosi hi Republican Party chungin President Bush kha amah a party rual nih Iraq War kongah Impeachment kan tuah lai, tiah an rak hal peng nain a rak thlauh hna. Cun President Trump zong hi Impeachment ngaingai cu a hau lai lo tiah a rak al balmi hna a si.

Nain, tutan ah Impeactment Trial hna a hun chuak lengah “kut aa tlai kho lomi” dirhmun tiang hna an hun phakmi hi cu kut aa tummi kut cu tlaih a har deuh ruangah maw asi hnga, “tlukceo le em ceo” kan ti deuh hna lai maw dik––U.S.A tuanbia ah thil a cang theng bal lomi kha a hun cang.

Khuaruah a har pahmi tu cu: President Bill Clinton zong President Trump zong Impeachment an ton lio celngel ah SOTU an chimmi hi a hun si.

U.S.A Uknak Phunghram nih SOTU cu kumkhat voikhat chim dingin a ti caah upadi cu zulh hrim cu a hau nain a nicaan theng a um lo. Cun muilang le bia thengin Congress ah President va kalin a chim lai, ti zong cu a um lo. Kum 1913 (President Wilson) hlan cu President nih SOTU cu cakuat in Congress ah an hei kuat ton ko i mah cu asi ko. Tutan ah Impeachment Trial lio celngel ah SOTU an hun tontermi hi cu an pahnih tein a nicaan an isiamremhmi asi ko caah an pahnih mawh si ko kun seh.
Credit-Salai Van Lian Thang

Be the first to comment

Leave a Reply

Your email address will not be published.


*